.jpg "The News Reporter")
રાજ્યમાં ઘણા સમયથી મેઘમહેર જોવા મળી રહી છે. વરસાદની રાહ ખેડૂતો સૌથી વધારે જોતા હોય છે. વરસાદને કારણે પ્રકૃતિ પણ સોળે કળાએ ખીલતી હોય છે. વરસાદની રાહ લોકો આતુરતાથી જોતા હોય છે. વરસાદની મજા લેતા બાળકોના દ્રશ્યો અનેક વખત આપણી સામે આવતા હોય છે. પરંતુ તે જ વરસાદ અનેક બાળકો માટે આફતરૂપ પૂરવાર થાય છે. વરસાદને કારણે રસ્તાઓ તૂટી જાય છે. વિકટ પરિસ્થિતિનું નિર્માણ થતું હોય છે. વરસાદને કારણે અનેક જગ્યાઓ પર કાદવ જોવા મળતો હોય છે, જેને કારણે અવરજવર કરવામાં મુશ્કેલીનો સામનો કરવો પડે છે. ત્યારે એવા અનેક દ્રશ્યો તેમજ વીડિયો તમને બતાવવા છે જેમાં શાળા સુધી પહોંચવા માટે બાળકો કેટલો સંઘર્ષ કરી રહ્યા છે.
સમસ્યાને જોવાના હોય છે અલગ અલગ દ્રષ્ટિકોણ
એક સમસ્યાને જોવાના અનેક દ્રષ્ટિકોણ હોય છે. એક જ સમસ્યા અલગ અલગ વ્યક્તિને અલગ અલગ લાગતી હોય છે. જો અમીર વ્યક્તિના હજાર રૂપિયા ખોવાઈ ગયા હોય તો તે આ વાતને એકદમ સામાન્ય રીતે લેશે. એ એવું વિચારે છે કે આ માત્ર હજાર રૂપિયા જ છેને. પરંતુ જો હજાર રૂપિયા સામાન્ય પરિવારમાંથી આવતા વ્યક્તિના ખોવાઈ ગયા હોય તો? તે રકમ તેને મોટી લાગે છે. તેવી જ રીતે જ્યારે કોઈ ગામની સમસ્યા સરકાર સુધી પહોંચે તો સરકારને તે નાની લાગતી હોય છે. એવું વિચારે કે આટલી મોટી સિસ્ટમમાં આવી સમસ્યાઓ ચાલતી રહે. પરંતુ તે જ સમસ્યા તે ગામ માટે મોટી હોય છે.
98 વિદ્યાર્થીઓ નથી પહોંચી શકતા શાળાએ
આ વાત એટલા માટે કરવી છે કારણ કે એવા વીડિયો જમાવટને મળ્યા છે જે વિદ્યાર્થીઓની પરેશાનીને દર્શાવે છે. વરસાદની સિઝન દરમિયાન અનેક જગ્યાઓ પર પાણી ભરાવાની સમસ્યા સર્જાતી હોય છે. એક જગ્યાએથી બીજી જગ્યા પર પહોંચવા માટે લોકોએ સંઘર્ષ કરવો પડતો હોય છે. ત્યારે જમાવટને એક દર્શકે વીડિયો મોકલ્યો છે જેમાં બાળકો કાદવમાંથી પસાર થઈ શાળા પહોંચવા મજબૂર બન્યા છે. જે વીડિયો અમને મળ્યો છે તે અમને અમેરિકાના દર્શકે મોકલાવ્યો છે. પેટલાદ પાસેના ચાંગાનો એ વીડિયો છે. જેમાં રસ્તો બતાવ્યો છે અને સવાલ કર્યો છે કે જો વિદ્યાર્થીને શાળામાં જવું હોય તો કેવી રીતે જાય? ખરાબ રસ્તાને કારણે 98 જેટલા બાળકો શાળાએ નથી જઈ શકતા. વિદ્યાર્થીના જીવનને બદલવા માટે એક લેક્ચર પણ કાફી હોય છે. ખરાબ રસ્તાને કારણે બાળકોના શિક્ષણ પર અસર પડી રહી છે.
પાકો રસ્તો ન હોવાને કારણે ભરાઈ જાય છે વરસાદી પાણી
આવા જ બીજા દ્રશ્યો દાહોદથી સામે આવ્યા છે જેમાં કાદવના સામ્રાજ્યને પાર કર્યા બાદ વિદ્યાર્થીઓ શાળાએ પહોંચી શકે છે. સ્થાનિકો દ્વારા અનેક વખત રજૂઆત કરવામાં આવી પરંતુ તેમ છતાં પણ કોઈ કાર્યવાહી કરવામાં આવી ન હતી. ગરબાડા તાલુકાના ચંદલા ગામના આ દ્રશ્યો છે જ્યાં પાકા રસ્તા ન હોવાને કારણે વિદ્યાર્થીઓ તેમજ સ્થાનિકોને ભારે મુશ્કેલી વેઠવાનો વારો આવે છે. પાણીનો યોગ્ય નિકાલ ન થતા પાણી રસ્તા પર ભરાઈ જાય છે.
સરકાર સુધી નથી પહોંચતો ગ્રામજનોનો અવાજ
અનેક એવા ગામો છે જ્યાં વરસાદી પાણી અનેક દિવસો સુધી ભરાયેલા રહે છે. જેને કારણે વિદ્યાર્થીઓ શાળામાં અભ્યાસ કરવા જઈ શકતા નથી. ઘણી વખત ગ્રામજનોની જાગૃતિનો અભાવ જોવા મળતો હોય છે, સરકાર સુધી લોકોનો અવાજ નથી પહોંચતો. અને જો અવાજ પહોંચે છે તો તેનો ઉકેલ નથી લાવવામાં આવતો. ત્યારે ગામમાં ઉભી થતી પરિસ્થિતિને કારણે વિદ્યાર્થીના ભવિષ્ય સાથે ચેડા થાય છે.
