ગુજરાતમાં નામ પૂરતી દારૂબંધી છે તેવું અનેક વખત તમે સાંભળ્યું હશે. મીડિયામાં પણ અનેક વખત બતાવામાં આવે છે કે અનેક જગ્યાઓ ગુજરાતમાં એવી છે જ્યાં ખુલ્લેઆમ દારૂ વેચાય છે.. વિપક્ષના નેતાઓ પણ દારૂબંધીને લઈ સવાલો ઉઠાવતા હોય છે.. ગુજરાતમાં ખુલ્લેઆમ દારૂ વેચાય છે તે બધા જાણે છે તો પણ સરકાર જાણે દંભમાં જીવતી હોય તેવું લાગે છે.. ભાજપના જ ધારાસભ્ય જો એમ કહે કે મારા વિસ્તારમાં દારૂના ભઠ્ઠા ચાલે છે તો? આ વાક્ય વાંચીને નવાઈ લાગીને? આ વાત ભાજપના ધારાસભ્ય કરશન સોલંકી દ્વારા કહેવામાં આવી છે.. 

કડીના પૂર્વ ધારાસભ્ય પર પણ કર્યા છે પ્રહાર! 

આમ તો ગુજરાતમાં દારૂ નથી મળતો, પણ ધારાસભ્ય જાતે એવુ કહે કે મારા વિસ્તારમાં દારુના ભઠ્ઠા ચાલે છે તો શું કરવાનું... આ વાત કડીના ધારાસભ્ય કરશન સોલંકી દ્વારા કરવામાં આવી છે.. કરશન સોલંકી જો કે પહેલીવાર ચર્ચામાં નથી, આ પહેલા કડીના પૂર્વ ધારાસભ્ય અને પૂર્વ ડે સીએમ નીતિનભાઈ પટેલ પર પણ કરશનભાઈએ આકરા પ્રહારો કર્યા હતા, ત્યારે પણ કારણ આંતરીક હોવાનું સામે આવ્યુ હતુ, આ વખતે પણ સ્થિતિ દેખાય એટલી સરળ તો નથી જ...

બુટલેગરો એટલા બધા બેફામ થઈ ગયા છે કે... 

ગુજરાતમાં દારૂ ખુલ્લેઆમ વેચાય છે તે બતાવવા માટે જમાવટની ટીમે પણ મહેસાણાથી લઈ અમદાવાદના અનેક વિસ્તારોમાં દારૂના અડ્ડાઓ પર લાઈવ રેડ કરી હતી.. બુટલેગરો એટલા બેફામ હોય છે કે એ સીધા જ પત્રકારો પર હુમલો કરે છે, પોલીસ ત્યારે કોઈ એક્શન નથી લેતી પણ આ જ બુટલેગરો ઘણી વાર પોલીસ પર પણ હુમલો કરે છે અને ત્યારે પોલીસને અહેસાસ થાય છે કે જે બદીનું એ પોષણ કરી રહ્યા છે એ જ બદી એક દિવસ એમને ખાઈ જવાની છે...! 

હકીકત નથી બદલાઈ જતી કે દારૂબંધીનો કાયદો માત્ર નામ પૂરતો છે..  

આમાં એક એન્ગલ એ પણ છે કે અહીંયા દારૂ કંઈ આજે જ મળતો થઈ ગયો હોય એવું નથી, પણ કડી પોલીસ સ્ટેશનમાં જે વહિવટદાર હપ્તા ઉઘરાવતો એને સાઈડ લાઈન કરીને બીજાને કામ સોંપ્યું તો આંતરીક હિતો જોખમાયાનું એક પાસુ છે.... જો કે ધારાસભ્ય પોતાના ફાયદા માટે ગયા હોય કે સત્ય ઉજાગર કરવા, હકિકત એનાથી પલટાઈ નથી જતી.... દારૂ ખુલ્લેઆમ વેચાય અને આપણે સતત ઢોંગ કરીએ એ કેવી રીતે ઉપાય હોઈ શકે... ગુજરાતમાં સતત દારૂબંધીના ધજાગરા ઉડી રહ્યા છે..