ગુજરાતમાં વિધાનસભા ચૂંટણીના બીજા તબક્કા માટે ચૂંટણી પ્રચાર જોરશોરથી ચાલી રહ્યો છે. લોકોને રિઝવવા માટે નેતાઓ આખરી દાવ અજમાવી રહ્યા છે. જેમ કે કોંગ્રેસના ઉમેદવારનો પ્રચાર કરવા માટે પાર્ટી પ્રમુખ મલ્લિકાર્જુન ખડગે ભિલોડા પહોંચ્યા હતા. જો કે ભિલોડા ખાતે કોંગ્રેસ અધ્યક્ષ મલ્લિકાર્જુન ખડગેની સભામાં ભીડ ભેગી કરવા માટે લોકોને રૂપિયા અપાતા હોવાનો વીડિયો વાઈરલ થયો છે.

કોંગ્રેસે બતાવ્યો મની પાવર

કોંગ્રેસ પ્રમુખની સભામાં ભીડ એકઠી કરવા માટે પાર્ટીના કાર્યકરો લોકોને રૂપિયા વહેંચી રહ્યા હોય તેવું વિડીયોમાં જોવા મળે છે. કોંગ્રેસનો ખેસ પહેરેલા કાર્યકરો એક પછી એક ગાડીની પાસે જઈને રૂપિયા વહેંચતા હતા. બે હજારની નોટ લેવા માટે વાહન ચાલકોએ રીતસર તેમના વાહનોની લાઈનો લગાવી છે.આ તમામ વાહનો ભિલોડા-શામળાજી માર્ગ પર એક કતારમાં ઉભા રહી ગયા હતા. વળી રૂપિયા આપ્યા પછી કોંગ્રેસનો ખેસ પહેરેલી એક વ્યક્તિ લિસ્ટમાં નામ ખરાઈ કરતી નજરે પડી હતી. એવું માનવામાં આવે છે કે જેને જેને રૂપિયા મળી ગયા હોય તેના નામ સામે એ વ્યક્તિ ટિક માર્ક કરતી હતી.