દિવાળીના તહેવારની ઉજવણી થઈ રહી છે. આજે કાળી ચૌદસ છે, આવતી કાલે દિવાળી લોકો મનાવશે. દિવાળીની ખરીદી પણ પૂર્ણ થઈ ગઈ હશે. સ્થાનિક લોકોને રોજગાર મળે તે માટે વોકલ ફોર લોકલને પ્રોત્સાહન આપવામાં આવી રહ્યું છે. સ્થાનિક કારીગર પણ દિવાળીની ઉજવણી સારી રીતે કરી શકે તે માટે અનેક કેમ્પેઈન ચલાવવામાં આવ્યા હતા જેમાં દિવાળીની ખરીદી ફેરીયાઓ જોડેથી કરવી જોઈએ તેવો મેસેજ આપવામાં આવ્યો હતો. ત્યારે વોકલ ફોર લોકલને પ્રોત્સાહિત કરવા ભાજપના પ્રદેશ અધ્યક્ષ સી.આર.પાટીલે સ્વદેશી સ્થાનિક વિક્રેતાઓ પાસેથી દીવડા ખરીદ્યા અને આવા વિક્રેતાઓ પાસેથી વસ્તુઓની ખરીદી કરવા માટે લોકોને અપીલ કરી હતી.

સી.આર.પાટીલે સ્થાનિક વિક્રેતા પાસેથી ખરીદ્યા દીવા 

છેલ્લા થોડા સમયથી વોકલ ફોર લોકલ કેમ્પેઈન ચલાવવામાં આવી રહ્યું છે. સ્થાનિક કારીગરોને કામ મળી રહે, તેમના પરિવારનું ગુજરાન થાય તે હેતુથી આ કેમ્પેઈન ચાલી રહ્યું છે. દિવાળીના સમયે સોશિયલ મીડિયા પર પણ અનેક એવા વીડિયો, અનેક એવી રિલ્સ આવતી હોય છે જેમાં આ મેસેજ પાઠવવામાં આવતો હોય છે. ગુજરાત તેમજ કેન્દ્ર સરકાર દ્વારા પણ આ કેમ્પેઈનને પ્રોત્સાહિત કરવામાં આવી રહ્યું છે. પીએમ મોદી સહિત અનેક દિગ્ગજ નેતાઓએ આ અંગે ટ્વિટ કર્યું હતું જેમાં આવો મેસેજ આપવામાં આવ્યો હતો. ત્યારે આ કેમ્પેઈનને પ્રોત્સાહિત કરવા સી.આર.પાટીલે સ્થાનિક કારીગર પાસેથી દીવડા ખરીદ્યા હતા અને લોકોને અપીલ કરી હતી તે સ્વદેશી સ્થાનિક વિક્રેતાઓ પાસેથી ખરીદી કરે.

અનેક પરિવારો આ કમાણી પર હોય છે નિર્ભર 

મહત્વનું છે કે અનેક એવા કારીગરો હશે જે રોજનું કમાઈને રોજનું ખાતા હશે. જો કોઈ દિવસ તેમના ત્યાંથી ખરીદી નથી થતી તો તેમના પરિવારને ભૂખ્યા રહેવાનો વારો આવે છે. તેમની કમાણી પર આખા પરિવારનું ગુજરાન ચાલતું હોય છે તેવા અનેક કિસ્સાઓ આપણી સામે છે. ત્યારે આવા લોકો પાસેથી પણ ખરીદી કરી લેવી જેમની દિવાળી આપણા થકી ઉજવળ બની શકે છે. આપણે તેમની પાસેથી સામાન ખરીદીશું તો જ તે પોતાના પરિવાર સાથે દિવાળી મનાવી શકશે...